«Бүркітші» тұсаукесері: қазақы «Тұтқындар» мен «Желді өзен»
Дебютант-режиссер Қуаныш Стаханов көрерменге өзінің «Бүркітші» атты картинасын ұсынды. Бұл – аңшы мен тергеушінің қазақ ауылында қылмыскерді іздеуі туралы оқиғасы.
Мемлекет қолдауымен түсірілген жоба болғандықтан, фильмнің Алматыдағы тұсаукесері дәл белгіленген уақыты бойынша өтті. Қонақтар сол сәтте жиналып, көрсетілім кешікпей басталды. Басты рөлдерді сомдаған актерлер де жұртпен суретке түсіп, журналистердің сұрақтарына жауап беруге уақыт тапты. Фильмде бүркітші-аңшының рөлін ойнаған Берік Айтжанов пен қаладан келген тергеушіні сомдаған Зарина Карменге ерекше назар бөлінді.
Айтпақшы, сюжет Тейлор Шериданның «Желді өзен» триллеріне күдік туғызарлықтай ұқсайды. Ол фильмде Элизабет Олсен үндістер резервациясындағы қыздың өлімін тергеуге жіберілген қалалық ФТБ агентін ойнаған. Жергілікті салт-дәстүр мен жағдайды білмейтін оған Джереми Реннер сомдаған аңшы көмектеседі.
«Бұл жанрдағы сүйікті фильмдерім олар – Шериданның «Желді өзені» мен Дени Вильневтің «Тұтқындары». «Бүркітші» мен «Желді өзен» оқиғалары басталуында ғана ұқсайды. Меніңше, бізде триллер мен детектив жанрындағы картиналар өте аз түсіріледі. Бұл туындыда бүгінгі күннің өзекті тақырыптары да қозғалған. Сондықтан фильм көрерменге қызық болады деп үміттенемін», — дейді режиссер Қуаныш Стаханов.
Соңғы кезде актер Берік Айтжанов балаларынан айырылған кекшіл әкелерді жиі ойнай бастады. Өзі мұндай амплуа өзгерісіне сабырмен қарайды.
«Актердің Ромеоны ойнайтын кезі болады. Мен ол кезеңнен өттім, енді салмақты, тәжірибелі әкелердің рөлін ойнаймын. Бұл фильмдегі кейіпкерім де сондай», — дейді актер.
Ал оның әріптесі Ермек Шынболатов «Дәстүр» және «Әмеңгер. Ағама аманат» фильмдеріндегі зұлым кейіпкерлерімен көптің есінде қалып, сол амплуадан әлі шыға алмай жүр.
«Алда мені мүлде басқа қырдағы – жақсы жігіттерді ойнайтын екі жоба күтіп тұр. Көрермен оларға өз бағасын берер деп үміттенемін. Соның бірі – Әділхан Ержановтың жұмысы», — деп атап өтті Ермек.
«Бүркітші» детективі 10 қыркүйектен бастап еліміздің барлық кинотеатрларында көрсетіледі.
Сурет: Adil Asqar
Бейне: Константин Суров (KinoMania)