«Өткір қалпақтылар» және «Майор мырзаның» оралуы

Бұл аптада стриминг платформаларында бізді екі фильм күтіп тұр: «Өткір қалпақтылар» туындысының көптен күткен жалғасы мен Фернан Магеллан туралы байопик, сондай-ақ үш хикая жарық көреді: танымал «Майор мырза» жобасының екінші маусымы, әйелдер достығы туралы детектив және радиациялық апат жайлы бразилиялық жоба.

Аптаның тұсаукесерлері

«Өткір қалпақтылар: Өлмес адам» (Peaky Blinders: The Immortal Man)

20 наурыздан бастап Netflix-те

Танымал «Өткір қалпақтылар» жобасы экранға төрт жылдан кейін қайта оралды. Бірақ жанкүйерлер күткендей жаңа маусым ретінде емес, толықметражды жалғасы ретінде. Аңызға айналған гангстер Томас Шелби Екінші дүниежүзілік соғыс кезінде Бирмингемге қайта оралып, ұлымен қауышады.

Хикаяны жасаған негізгі шығармашылық топ толық сақталған. Ал жаңа кейіпкерлерді Ребекка Фергюсон, Тим Рот және Стивен Грэм сынды жұлдыздар сомдаған. Батыс сыншыларының алғашқы пікірлері басым бөлігі  оң: туындының ауқымы мен саспенсі үшін мақтап, ол хикая жанкүйерлеріне ғана емес, қарапайым көрерменге де қызық болады деп бағалап отыр.

Аптаның қазақстандық тұсаукесері

«Майор мырза 2»

20 наурыздан бастап Unico Play платформасында

Өткен жылы жарық көрген «Майор мырза» сериалының алғашқы маусымы Unico Play онлайн-платформасындағы ең көп көрілген жобалардың біріне айналған еді. Екінші маусымда көрерменге жақсы таныс, шағын қалада өзін полицей етіп көрсететін бандит Талғат Қылы енді көрші ауданнан келген жаңа капитан әйелмен бетпе-бет келіп, жаңа түйткілдерді шешуге мәжбүр болады.

Комедиялық сериалдың актерлік құрамына Куантай Абдимади («Казахские страшные сказки») мен Эльмира Калбай («Батыр из прошлого») қосылды. Режиссерлік тізгін тағы да Асет Жумаканның қолында, ал басты рөлде – қайталанбас Нышанбек Жубанаев.

Басқа да тұсаукесерлер

«Магеллан» (Magalhães)

17 наурыздан бастап түрлі платформаларда

Ақ-қара фестивальдік, ұзақтығы сегіз-тоғыз сағаттық картиналарымен танымал филиппиндік режиссер Лав Диас XVI ғасырдағы аңызға айналған теңіз саяхатшысының тарихына ден қойған. Бәлкім, бұл – оның көрерменге барынша жақын туындысы шығар, таңғаларлығы, «Магелланның» ұзақтығы небәрі екі жарым сағат, оның үстіне фильм түрлі-түсті түсірілген, ал басты рөлде – аты шулы жұлдыз Гаэль Гарсиа Берналь. Диас бұл туындыны жеті жыл бойы түсірген, ал режиссердің адал жанкүйерлері, өздеріңіз де аңғарғандай, ұзақтығы тоғыз сағат болатын толық нұсқасын күтіп жүр.

«Мінсіз емес әйелдер» (Imperfect Women)

18 наурыздан бастап Apple TV+ платформасында

Екі әйел құрбылары өлтірілген шағын қалаға келіп, оның өліміне кім кінәлі екенін анықтауға тырысады. Хикаяға негіз болған бірдей аталған кітапты сыншылар әйелдер достығын ең әсерлі зерттеген туындылардың бірі деп атаған. Жобаның шоураннері – Энни Уайзман («В ритме жизни»), ал басты рөлдерді Элизабет Мосс («Рассказ служанки»), Керри Вашингтон («Джанго освобождённый») және Кейт Мара («Карточный домик») сомдаған.

«Гояния: радиациялық апат» (Emergência Radioativa)

18 наурыздан бастап Netflix-те

Бразилиялық бұл тарихи сериал атом электр станциясынан тыс жерде болған, тарихтағы ең ірі радиациялық апаттың 40 жылдығына орай ұсынылып отыр. 1987 жылы екі металл сынығын жинаушы қаңырап бос қалған ғимараттан көгілдір ұнтағы бар құрылғыны тауып алады. Кейін сол ұнтақтың ажал құштыратын радиоактивті шаң екені белгілі болады.

Жобаның режиссерлерінің бірі – «Нарко» мен «Перри Мейсон» секілді ірі хиттермен жұмыс істеген Фернандо Коимбра.