Құбыжыққа айналған «Миньондар»: қазақстандықтар өткен аптада кинотеатрдан не тамашалады?

«Миньондар мен құбыжықтар» анимациялық хиты прокатқа шыға сала көш бастады – оған тіпті «Бишарашки» де төтеп бере алмады.

«Бишарашки в Индии: в поисках мамы» комедиясы екі апта бойы бокс-офистің бірінші орнында тұрды. Алайда өткен демалыста прокатқа шыққан «Миньондар мен құбыжықтар» қазақстандық фильмді бірден көш басынан ығыстырып, лидер атанды. 9-12 шілде аралығындағы төрт күннің қорытындысы бойынша, зұлымдардың кішкентай сары көмекшілері туралы анимация 230 млн теңге табыс тапты. «Бишарашки» үшінші аптасында 81 млн теңге жинап, айтарлықтай артта қалды. Үшінші орында тағы бір анимациялық франшиза – «Ойыншықтар хикаясы 5». Оның табысы 43 млн теңгені құрады. Оңтүстіккореялық «Колония» триллері де 35 млн теңге жинап, жақсы нәтиже көрсетті. Ал бестікті өткен аптаның жаңа туындысы – «Кодекс Данте» фантастикалық драмасы түйіндеді. Фильм демалыс күндерінің қорытындысы бойынша 33 млн теңге тапты.

«Миньондар мен құбыжықтардың» Қазақстандағы осындай қарқынды басталуы шетелдік анимациядан мұндай нәтиже күтпеген кино сыншысы Дмитрий Мостовойды біраз таңғалдырды.

«АҚШ-та жаңа «Миньондар» өте қарапайым бастады және алғашқы аптаның қорытындысы бойынша «Ойыншықтар хикаясы 5» мультфильмін аз ғана айырмашылықпен басып озды. Айырма небәрі бірнеше миллион доллар болды. Ал бізде «Миньондар мен құбыжықтар» «Ойыншықтар хикаясы 5» фильмінің алғашқы нәтижесіне тең деңгейде бірден алға шықты. Демек, біздің көрермен миньондарды әлдеқайда жақсы көріп, оларға көбірек ықылас танытады. «Ойыншықтар хикаясы» соншалықты бізге жақын дүние емес сияқты: Вуди, Джесси, Базз Лайтер және басқа кейіпкерлер бізде культке айналған жоқ. Ал миньондар – мүлде басқа әңгіме. Дегенмен жаңа бөлімнің деңгейін ескерсек, екінші аптада бұл мультфильмнің түсімі айтарлықтай төмендейді деп ойлаймын», — дейді Қазақстан киносыншылар қауымдастығының мүшесі.

«Миньондар мен құбыжықтар» – «Жексұрын мен» біртұтас франшизасындағы жетінші фильм. Ол бір мезетте «Жексұрын мен» фильмінің приквелі әрі «Миньондар» және «Миньондар: Грювитация» картиналарының жалғасы саналады. Оқиға 1920 жылдары өрбиді: миньондар Голливудтың «алтын дәуіріне» жетіп, құбыжықтар туралы өз фильмін түсіруге бел буады. Осы мақсатта олар нағыз құбыжықтарды іздеуге аттанады. Анимациялық блокбастер әлемдік прокатқа екі апта бұрын шыққанымен, әзірге оның көрсеткіштері аса әсерлі емес. Екі толық демалыстың қорытындысы бойынша «Миньондар мен құбыжықтар» 280 млн доллар жинады. Мультфильмнің бюджеті 85 млн доллар екенін ескерсек, бұл жаман нәтиже емес. Дегенмен 2022 жылы «Миньондар: Грювитация» мен 2024 жылы «Жексұрын мен 4» фильмдерінің әрқайсысы шамамен 900 млн доллар табыс тапқан еді. Ал жаңа бөлім мұндай көрсеткішке жете қоймайтын сияқты.900 млн, а новой части, кажется, таких цифр не видать.

«Бишарашки в Индии: в поисках мамы» картинасының қарқыны үшінші аптада бәсеңдеп, тіпті 100 млн теңге де жинай алмады. Дегенмен комедиялық франшизаның төртінші фильмі үш толық демалыс ішінде 560 млн теңге табыс тапты.

«Төртінші «Бишарашкиді» жақсы нәтиже көрсетуі заңды. Бұл бөлімнің соңғысы екені де жарияланды. Алайда бұл көрерменді жақын күндері кинотеатрларға көбірек тарту үшін авторлар қолданған маркетингтік тәсіл болуы да мүмкін», — деп есептейді Мостовой.

Рейтингте одан кейін « Ойыншықтар хикаясы 5» орналасты. Төрт апта ішінде мультфильм Қазақстанда 770 млн теңге жинады. Pixar мен Disney анимациясы әлемдік прокатта да өте жақсы нәтиже көрсетіп отыр, бүгінде оның табысы 880 млн долларға жетті. Сарапшылар алдағы екі апта ішінде жаңа « Ойыншықтар хикаясы» бір миллиард доллар межесіне жетеді деп болжап отыр.

Төртінші орында зомби-триллер «Колония» тұр. Үш апта ішінде оңтүстіккореялық картина 188 млн теңге жинады. Он жыл бұрын үлкен резонанс тудырған «Пусанға жол тартқан пойыз» фильмін жасаушылардың жаңа туындысы сыншыларға ғана емес, көрерменге де ұнады. Мостовойдың пікірінше, бұл да заңды нәтиже, өйткені қазақстандық көрермен корей хоррорларын жақсы көреді.

Бесінші орында өткен аптаның жаңа туындысы – режиссер Джулиан Шнабельдің «Кодекс Данте» фильмі. Оқиғасы екі түрлі дәуірде өрбитін күрделі картина қазіргі заманғы жазушы мен Данте Алигьеридің тарихын баяндайды. Фильмде тамаша актерлік құрам жиналған: Оскар Айзек, Аль Пачино, Галь Гадот, Джерард Батлер, Джейсон Момоа және Джон Малкович.

«Меніңше, танымал режиссер Джулиан Шнабельдің фильмі екінші аптада сәтсіздікке ұшырайды. Картинаға берілген пікірлер, жұмсартып айтқанда, қарама-қайшы, тіпті көбіне теріс. Алғашқы аптада фильмге табыс әкелген көрерменнің басым бөлігі, сірә, Шнабель үшін емес – ол бәрібір көпшілікке емес, тар аудиторияға арналған режиссер – керемет актерлік құрам үшін барған. Бірақ пікірлерге қарағанда, мықты актерлердің өзі фильмді құтқара алмаған», — деп атап өтті кино сыншысы.

Рейтингтің екінші бестігін прокаттың он екінші аптасында да жақсы табыс тауып жатқан «Майкл» фильмі ашады. Өткен демалыс күндерінің қорытындысы бойынша музыкалық байопик 11 млн теңге жинады, ал осы уақыт аралығындағы жалпы табысы 1 млрд 91 млн теңгеге жетті. Антуан Фукуаның картинасы әлемдік бокс-офисте де миллиардтық межеден асты – қазір оның табысы 1 млрд 2 млн долларды құрайды. Бұл – осындай көрсеткішке жеткен алғашқы өмірбаяндық фильм әрі Lionsgate студиясының тұңғыш жобасы.

Ал Крэйг Гиллеспидің «Супергёрл» фильмі, керісінше, баяу болса да, тоқтаусыз төмендеп барады. Үшінші аптасында суперқаһармандық блокбастер Қазақстанда небәрі 8 млн теңге жинады, ал жалпы түсімі 125 млн теңгені құрады. Әлемдік прокаттағы жағдай да анық: бюджеті 186 млн доллар болған фильм әзірге 115 млн доллар ғана тапқан.

«Екі қарама-қайшы мысал – «Майкл» мен «Супергёрл». «Майклдың» прокатта осынша ұзақ уақыт бойы жақсы нәтиже көрсетіп келе жатқанына қатты таңғалдым. Қазір ол көп табыс жинап жатқан жоқ, бірақ он екі апта бойы үздіктер қатарынан түспей келеді. Қазақстанда Майкл Джексонның жанкүйерлері осыншалық көп болады деп күтпедім. Оның үстіне фильмнің өзі де орташа деңгейде. Иә, мәні жағынан бұл – фильм-концерт, дегенмен бәрібір таңғаларлық жағдай. Екінші жағынан, бұл туынды бәріне ұнай алады әрі достармен бірге кинотеатрға баруға қолайлы нұсқа. «Майклды» бірнеше рет көргендер де бар шығар деп ойлаймын. Бұл – Қазақстан прокатындағы ерекше құбылыс. Ал «Супергёрл», керісінше, барлық жерде сәтсіздікке ұшырап жатыр. Бірақ одан басқа нәтиже күту де қиын еді. Өкінішке қарай, кейінгі жылдары суперқаһармандық фильмдердің барлығы дерлік бір үлгімен түсіріледі. Бәрі алдын ала белгілі болса, мұндай фильмдерді көрудің қажеті қанша?» — дейді Мостовой.

Сегізінші орында Оливия Уайлдтың «Приглашение» фильмі тұр. Оның апталық табысы екі есе азайып, бұл жолы 7 млн теңгені құрады. Осы қарқын сақталса, фильм көп ұзамай алғашқы ондықтан шығып қалады.

Одан төменгі орында тай хорроры «Астрал. Проклятие экзорциста» орналасты. Фильм прокаттың екінші аптасында да 7 млн теңге жинады. Ал алғашқы аптадағы табысы 10 млн теңге болған.

Карри Баркердің «Обсессия» фильмі оныншы орнын сақтап қалды. Әлемдік хиттің Қазақстандағы нәтижесі аса жоғары емес. Екі ай ішінде қорқынышты фильм елімізде шамамен 180 млн теңге жинады. Ал әлемдік прокаттағы табысы небәрі 1 млн доллар бюджетпен 426 млн долларға жетті.