«Бабай» фильмінің тұсаукесері: балаларыңа ұялмай көрсетуге болатын туынды
Сәрсенбі күні «Арман» кинотеатры «Бабай» фильмінің тұсаукесеріне орай ең кішкентай көрермендерге есігін айқара ашты. Іс-шараны ұйымдастырған Unico Play кинокомпаниясы балалар үшін нағыз мереке жасауды ұйғарған еді. Және олардың бұл ойы жүзеге асты!
Бұл күні кинотеатрдың фойесі үлкен балалар фестиваліне айналды: кіреберісте қонақтарды аниматорлар қарсы алып, ішінде ең кішкентай көрерменге арналған шеберлік сабақтары ұйымдастырылды, ал іс-шара жүргізушісі түрлі ойындар мен квиздер өткізді. Шақырылған ересектердің бәрі балаларының ертіп келді.
«Кино тұсаукесері – әрдайым мереке. Кинодағы ең басты нәрсе – эмоция, кино көрерменде эмоция тудыруы керек. Бізде балалар тақырыбына арналған фильмдер аз. Олардың қатары көбейсін, кішкентай көрермендеріміз осындай фильмдермен өсіп, ертең ересек көрерменге айналсын», — деді фильмде басты кейіпкердің әкесін сомдаған актер Азамат Сатыбалды.
Басты рөл сегіз жасар Жанель Серікболға бұйырды. Ол фильмде анасы қайтыс болғаннан кейін мінезі тұйықталып, үйден шықпай қойған Камила есімді қызды сомдайды. Қамқор әкесі оның өмірге деген қызығушылығын қайтаруға барын салады, бірақ әрекеті нәтижесіз болады. Бір түнде олардың үйіне жолы болмаған ұры кіріп кетіп, оны қыз байқап қояды. Тығырықтан шығу үшін ұры өзін Бабай елесі ретінде таныстырады. Камила оған сеніп, онымен дос бола бастайды…
«Қатты қобалжып тұрмын, бұл – менің алғашқы тұсаукесерім, алғашқы үлкен рөлім. Фильм сіздерге ұнайды деп үміттенемін. Әсерлеріңізді, пікірлеріңізді күтемін», — деді Жанель көрермендерге.
Режиссер Олжас Ермекбаев үшін де бұл толықметражды кинодағы дебют. Бұған дейін ол негізінен «Няня. Бизнес по-қыздарски» сериалы мен Qaitalanbasyn киноальманахы сияқты стриминг жобаларында жұмыс істеген.
«Бұл да менің алғашқы тұсаукесерім. Бүкіл командаға алғыс айтқым келеді – бұл аса мейірімге толы сапар болды. Актерлерімізге, әсіресе балаларға көп—көп рақмет. Түсірілім алаңында біз оларды емес, керісінше, олар бізді басқарды. Продюсерлердің маған артқан сенімін өмір бойы ұмытпаймын. Баршаңызға рақмет», — деді Олжас.
«Жеті гүл», «Ыстық ұя» және «Таптым-ау сені» сияқты хит жобаларға атсалысқан фильм продюсері Бұхар Марат өз оқиғасын айтып берді.
«Менің сегіз жасар қызым бар. Бір күні ол менен: “Әке, сіз немен айналысасыз?” — деп сұрады. Мен кино түсіретінімді айттым. Ол: “Қандай кино?” — деді. Бұған дейін менде көбіне ажырасу туралы және басқа да сондай туындылар болған, оларды қызыма көрсете алмайтынмын. Ал бұл фильмді, ақыры, көрсете аламын. Соған қуаныштымын», — деді продюсер.
Бәрі қазақтың барша мерекесіндегідей бата мен шашумен аяқталды. Фильмді 21 мамырдан бастап еліміздегі барлық кинотеатрлардан көре аласыздар.
